მკვლელი ჭიანჭველები

  კაცი სარწეველაში, სახლის პირველი სართულის მისაღებ ოთახში, როგორც საქართველოში მოიხსენიებენ „პადვალში“ იჯდა. ის მხოლოდ მოკლე შავი ბრიჯითა და საზაფხულო ქოშებით იყო შემოსილი. ერთი ხელი სარწეველას სახელურზე ჩამოედო, მეორეთი კი ტელევიზორის პულტი ეჭირა. კაცი ტელევიზორში საინფორმაციო გამოშვებას უყურებდა. მან ხელი,რომელიც სარწეველას სახელურზე ედო აწია და გულმკერდზე ამოსული თმები მოიფხანა. კაცს სახლის კარი ოდნავ ღია დარჩენოდა. ძველებური კარები იყო. ზედა ორი ფანჯარა ერთმანეთისადმი პარალელურად განლაგებულიყო, მესამე კი მათ ქვემოთ ჰორიზონტალურად მდებარეობდა. თავად კარები თეთრი ფერის იყო , მას რკინის სახელური ჰქონდა. ფანჯრებს კი შავი რეზინის კანტები დაჰყვებოდა. ოთახში სინათლე ბჟუტავდა. ღიად დარჩენილი კარიდან სახლში ჯერ ერთი ჭიანჭველა შემოვიდა. ის ზომით ძალიან დიდი იყო. მას უკან მთელი ლაშქარი მოყვა. ისინიც უჩვეულო ზომით გამოირჩეოდნენ. ჭიანჭველების ამალა იატაკზე დიდ , შავ მოძრავ ლაქას ქმნიდა, თუმცა კაცს ეს არ შეუნიშნავს. მას ტელევიზორი ხმამაღლა ჩაერთო და თვალმოუშორებლივ უყურებდა. უზარმაზარი შავი ლაქა კი ნელ–ნელა კაცისკენ მიიწევდა. ჭიანჭველები უკვე სარწეველას ფეხებზე ცოცდებოდნენ. ისინი კაცისკენ სწრაფად მიიწევდნენ. მალე რამოდენიმე მათგანი კაცის ფეხებზე აცოცდა. მათ კაცს კბენა დაუწყეს. კაცმა ფეხი მოიქავა. ჭიანჭველები ძირს გადაცვივდნენ, მაგრამ მათ მაგივრად სხვები აცოცდნენ კაცი ფეხებზე. კაცმა მხოლოდ ახლა დაიხედა ფეხებზე. მან ჭიანჭველების უზარმაზარი ლაშქარი დაინახა, რომლებიც მის ფეხებზე ცოცავდნენ.

– რა ჯანდაბაა?– იკითხა კაცმა და ფეხი ძლიერად დააბაკუნა , თან ისინი ხელითაც მოიშორა. მერე იატაკზე მყოფ ჭიანჭველებს ფეხით ჭყლეტა  დაუწყო. ახლა კაცს ზურგი მოექავა. მან მარცხენა ხელი ზურგზე მოისვა. ხელმა ცოცხალ არსებებს გადაუარა.  რამოდენიმე კაცის ხელსაც აყვა. კაცმა ხელზე დაიხედა. მისი თითები, მისი ხელი ჭიანჭველებით  იყო სავსე. კაცი სარწეველიდან წამოხტა. მან ორივე ხელით დაიწყო ჭიანჭველების მოშორება, მაგრამ მისი ზურგიდან ისინი კაცის ბეჭებზე აცოცდნენ. ამასობაში კაცის ფეხებიდან ჭიანჭველებმა მისი ტორსისკენ გადაინაცვლეს. კაცმა გულმკერდთან მიიდო ხელი , მუშტი მაგრად შეკრა , მოუჭირა და მთელი ძალით ზემოთ ამოქაჩა. კაცმა სიმწრისგან დაიყვირა. მან ხელი გახსნა. მას ხელში თავისი თმების ბღუჯა შერჩენოდა,რომლის ღერებზე ჭიანჭველები დაცოცავდნენ. ისინი უკვე კაცს შარვალშიც უძვრებოდნენ. ჭიანჭველებმა კაცი მთლიანად დაფარეს. ისინი მის ყელს მისწვდნენ,კაცი მათ მოშორებას ცდილობდა, მაგრამ ისინი ძალიან ბევრნი იყვნენ. ჭიანჭველები კაცს სახეზე აცოცდებოდნენ. ის მათ იშორებდა , მაგრამ ძველებს ახლები ანაცვლებდნენ. კაცმა პირი ძლიერად მოკუმა,რომ მას ჭიანჭველები პირში არ ჩაძრომოდნენ. ისინი კაცს ცხვირის ნესტოებში შეუძვრნენ. კაცმა ხელი სასწრაფოდ ცხვირთან იტაცა, მაგრამ ჭიანჭველები მის ცხვირში ღრმად გაუჩინარებულიყვნენ. კაცმა სუნთქვა ვეღარ შეძლო. მან ხელები მექანიკურად ცხვირს მოუჭირა, შემდეგ ჰაერის ჩასასუნთქად პირი გააღო და ჭიანჭველებიც უმალ იქ ჩაუძვრნენ. ისინი უკვე კაცის ყურებშიც ძვრებოდნენ. კაცმა ხველება დაიწყო, მერე ხელები ყელზე მიიჭდო. ის იხრჩობოდა,ვეღარ სუნთქავდა. კაცი ხროტინებდა, შემდეგ კი  იატაკზე უგონოდ დაეცა. მისი ტანი ჭიანჭველებმა მთლიანად  დაფარეს. ისინი მის გახელილ თვალებში ძვრებოდნენ და თვალის გუგებს სიამოვნებით შეექცეოდნენ, ისევე როგორც კაცის სხეულის სხვა ნაწილებს. ამ დროის მანძილზე ტელევიზორში საინფორმაციო გამოშვება მიმდინარეობდა. ტელევიზორში საინფორმაციო გადაცემის წამყვანის ხმა გაისმა : „და დღის ბოლო ინფორმაცია. საქართველოში მკვლელი ჭიანჭველები არიან შემოსეულნი. მათ უკვე ექვსი  ადამიანი შეიწირეს. ეცადეთ კარები ღიად არ დაგრჩეთ. თუ ერთ ასეთ ჭიანჭველას მაინც შეამჩნევთ მას სასწრაფოდ წყალი დიდი რაოდენობით დაასხით და საგანგებო სიტუაციების სამსახურს დაუკავშირდით. სულ ეს იყო, ჩვენ ერთმანეთს მომავალ კვირაში შევხვდებით“...